Plakette Liestel 2017

Au das Joor kasch wieder bi eus bi jedem aktiv Mitglied oder an euserne Verkaufstagä die aktuelli Plakette kaufe. Mir verkaufe eusi Plakette zum Eine am Samstig 18.02.2017 und zum Andere am Samstig vor dr Fasnecht dr 04.03.2017 im Städtli vorem Stabhof und vorem Bücheli Center. Am 18.02.2017 wärde mir zudäm au no am Nomittag en Uftritt vorem Bücheli Center ha.

Folgend no dr offizieli Färs zu dr neue Plakette:

Uf em Land aber au im Stedtli

läse chames in jedem Blettli

Lieschtel baut und zwar wie gschtört

doch nur no verdichtet wie me ghört

e Hüsli plane macht nümm Sinn

verdichtet baue isch hütt inn

in dä Quartier werde d’Gärte rationalisiert

und uf däm Land neu Quartierplän realisiert

Bewilligunge zum verdichtet baue si nümm streng

drum wird jetzt s’Wohne furchtbar eng

d’Rothuusstrooss wird zur Rothuusgass

dr Äntebach mehr troch als nass

d’KMU will d’Stadt beläbe

und nach höchere Sphäre schträbe

die Drei vom Törli ghört me jodle

im Oris e Hochhuus dünn wie ne Nodle

doch halt mir Fasnächtler mache do nit mit

ob verdichtet baue oder nit

mir gässle im Stedtli wie eh und jeh

und au dr Chienbäse löhn mir eus nit lo neh

denn d‘Fasnacht isch’s wo eus het prägt

und s’Törli het au scho vill erläbt !!!